Organizatorët e “Lojërave Olimpike Los Angeles 2028” kanë rivlerësuar shpenzimet që duhen për zhvillimin e eventit më të rëndësishëm sportiv, duke e çuar buxhetin thuajse 7 miliardë dollar. Kostoja e “Los Angeles 2028” ka kapur shifrën 6.88 miliardë dollarë, me një rritje 1.36 miliardë dollarë krahasuar me parashikimet fillestare.
Rritja e shpenzimeve ka ardhur nga masat e marra për indeksimin e çmimeve për shkak të inflacionit në një periudhë të gjatë.
Shifrat janë dhënë sot nga komiteti organizator dhe janë në thelb në përputhje me draftin origjinal të kontabilitetit, përveç pjesës që lidhet me kostot e infrastrukturës (nga 1.19 miliardë dollarë në 1.46 miliardë) dhe fondit të garantuar nga qyteti dhe shteti (nga 487 milionë në 615 milionë). Fillimisht, qyteti i Los Angelesit kishte buxhetuar 5.3 miliardë për të organizuar “Lojërat 2024”, që më vonë iu caktuan Parisit.
