Neymar humbet Kupën e Amerikës. Sulmuesi i Paris Saint Germain pësoi një dëmtim në gju në minutën e 17-të të takimit miqësor që Brazili fitoi me shifrat 2-0 ndaj Katarit. Pas kontaktit me Assim Madibo, Neymar la fushën i përlotur ndërsa pas kontrolleve që i bëri mjeku i përfaqësueses braziliane, ylli i Seleçaos u transferua në një spital në kryeqytetin e Brazilit në shoqërinë e babait të tij Edu Gaspar dhe mjekut të kombëtares Kalil. Vetëm disa orë pas dëmtimit që pësoi lojtari, konfederata braziliane e futbollit konfirmoi se Neymar ka pësuar një thyerje të ligamentit në gjurin e djathtë që do ta mbajë jashtë fushave të futbollit nga 6 deri në 8 javë ndërkohë që nuk përjashtohet një tjetër operacion. Në këtë mënyrë Neymar nuk do të luajë në Kupën e Amerikës që do të zhvillohet në Brazil nga mesi i këtij muaji deri në fillim të korrikut, ndërkohë që trajneri Tite duhet të zgjedhë një tjetër lojtar për ta zëvendësuar dhe ai mund të jetë sulmues ose mesfushor, pasi emrat që qarkullojnë janë ata të Lucas Moura, Vinicius Jr dhe Fabinho.
