Bayerni i Mynihut arriti të triumfojë me rezultatin tenistik 6-1 ndaj Mainzin të “Allianz Arena”, në një takim të cilin e dominoi totalisht gjatë gjithë 90-minutëshit, duke marrë kështu edhe fitoren e parë sezonale para tifozërisë së tij.
Bavarezët u befasuan në minutën e 6’ nga Boetius, që shënoi në portën e Neuer, ndërsa më pas zhvendosën lojën në gjysmëfushën kundërshtare dhe gjetën barazimin në minutën e 36’ me anë të mbrojtësit francez Pavard, që shënoi një gol të bukur pas zhvillimeve nga goditja e këndit.
Në minutën e fundit të pjesës së parë ishte mbrojtësi i krahut tjetër, austriaku David Alaba, që shënoi edhe golin e dytë për skuadrën e drejtuar nga Niko Kovac, duke çuar bavarezët në dhomat e zhveshjes në avantazhin 2-1.
Pjesa e dytë foli tërësisht për të zotët e shtëpisë që shënuan fillimisht me kroatin Perisic dhe më pas me Coeman, Lewandowski dhe Davies, të cilët kompletuan suksesin tenistik 6-1 ndaj Mainzit.
Amir Abrashi pa nga stoli ndeshjen mes Feriburgut dhe Kolnit, që u fitua me rezultatin 1-2 me përmbysje nga ana e miqve, ndërsa në sfidën Wolfsburg-Paderborn, që përfundoi në barazim 1-1, për miqtë ishte titullar edhe mesfushori më i ri i Kombëtares Shqiptare Klaus Gjasula.
Në barazim pa gola përfundoi ndeshja mes Bayer Leverkusenit dhe Hoffenhaimit, ndërsa Schalke 04 u rikthye te suksesi, pasi mposhti me rezultatin e thellë 3-0 Herthën e Berlinit. Në orën 18:30 do të luhet sfida tjetër e Bundesligës mes Union Berlin dhe Borussia Dortmund.
