Trajneri i Tiranës, Emanuel Egbo, në lidhjen direkte me emisionin “Gol pas Goli” e kishte të vështirë ta shpjegonte atë fitore të madhe të Tiranës ndaj Kukësit, në “Air Albania”.
“Jam pa fjalë. Nuk e di nga t’ia filloj. Lavdia shkon për Zotin. Është një mrekulli. Ka një Zot lart dhe nëse beson, nuk të harron. Nëse beson, do ta arrish atë që do. I falënderoj çunat për shpirtin e garës. Zoti i ka parë ata dhe tregon që është dora e tij në ekip. E nisëm mirë ndeshjen, si në pjesën e parë dhe në të dytën. Ishim të nxituar në përfundimin e aksioneve deri kur pësuam gol. Më pas Zoti përsipër të ndryshonte gjithçka.”
Vangjeli, pa përgjegjësi: Goli i pësuar nuk ishte naiv, është diçka që ndodh në lojë. Nuk ishte gafë e Kristit, nisi që në krah gabimi. U driblua lojtari ynë dhe lojtari i Kukësit e futi topin në zonë. Kemi pësuar disa gola nga krahët. Do t’i rregullojmë gjërat që kemi gabim, edhe kur fitojmë.
Festë para derbit: Derbi? T’i lëmë lojtarët ta shijojnë këtë fitore. Një ditë pushim më shumë nuk është diçka e madhe. Nesër lojtarët do jenë në stërvitje. Lojtarët kanë fituar vetëbesim, por nuk besoj se do të kalojmë në eufori. Do qëndrojmë me këmbë në tokë.
Ndryshimet: Muçi në pjesën e parë luajti shumë mirë. Deri kur pësuam ra dhe nuk e pamë të arsyeshme të luante bashkë me Ngoonë. Goli i Bathës nuk ishte fat. Nëse njeriu i bën “hyzmetin” punës, nëse fut lojtarët në pozicionin e duhur, Zoti sheh dhe jep dorën e tij. Zoti ka dorë te ne. Edhe kur po humbnim e dija që do fitonim. I thashë Kristit, mos u mërzit. Besimin në Zot nuk e ndryshoj dot.
Ismailgeci: Ismailgeci meriton më shumë minuta. I kam thënë që të jetë gati para ndeshjes. Ia kam dhënë besimin, meriton edhe më shumë. Duke parë organikën, çdo lojtar duhet të jetë gati për të qenë në fushë.
