Egnatia ishte befasia e këtij sezoni në Kategorinë e Parë, pasi me një investim të konsiderueshëm ia doli të ndërtojë një ekip të aftë për të siguruar një biletë direkte për në elitën e futbollit shqiptar, Kategorinë Superiore.
Klubi nga Rrogozhina nuk ka humbur kohë me festimet, pasi ka nisur menjëherë punën për të përforcuar edhe më shumë ekipin, me qëllim që të përfaqësohet denjësisht edhe në Superiore sezonin e ardhshëm.
Kështu pas rinovimit me një pjesë të madhe të titullarëve të sezonit të kaluar, sot u njoftua edhe afrimi i mbrojtësit anësor Franc Ymeraliaj, i cili ishte pjesë e Bylisit, ku mbajti edhe shiritin e kapitenit në shumë ndeshje.
Ballshiotët nuk ia dolën të mbijetojnë në elitë dhe do të garojnë në Kategorinë e Parë, ndërsa Ymeraliaj do të mbetet në Superiore, pasi ka firmosur për dy vite me klubin e Egnatias dhe do të vihet në dispozicion të trajnerit në fillim të muajit korrik, kur edhe pritet të nisin përgatitjet për sezonin e ri.
