Valon Ethemi ka realizuar golin e radhës në Turqi. 25-vjeçari shqiptar zhbllokoi sfidën Istanbulspor-Alanyaspor në minutën e 67’. Lojtari nga Tetova u nis në sprint, mori një asist nga Eduard Rroca dhe dërgoi topin në rrjetë falë një parabole të bukur.
Ky ishte goli i nëntë sezonal në Superligën turke për Ethemin, i cili numëron edhe tri asiste. Tetovari është ftuar disa herë nga përfaqësuesja e Maqedonisë së Veriut, teksa është aktivizuar në vetëm një ndeshje zyrtare dhe dy miqësore.
Ndërkohë, ky ishte asisti i parë për kapitenin Rroca, i cili ka shënuar edhe një gol. Për Istanbulsporin debutoi futbollisti Florian Loshaj, i cili u transferua vetëm pak ditë më parë tek ekipi nga Stambolli. Në pjesën e dytë, në fushë për vendasit u aktivizuan edhe Sindrit Guri dhe Jetmir Topalli.
Avantazhi i Istanbulsporit zgjati vetëm 4 minuta, portugezi Ivan Cavaleiro barazoi përkohësisht për Alanyasporin, por vendasit u rikthyen në avantazh në minutën e 77′. Loshaj dhuroi një asist fantastik për Emir Gultekin, i cili realizoi një gol shumë të bukur.
