20 fitore radhazi në të gjitha kompeticiont, një rekord të cilin Manchester City po e thellon ndeshje pas ndeshjeje. Citizens siguruan suksesin e radhës në Premier League, këtë herë 2-1 përballë West Hamit në “Etihad”, ku loja mbeti e hapur deri në vërshëllimën e trefishtë të kryesorit, që sanksionoi suksesin e ekipit të Pep Guardiolës.
Takimi u zhbllokua pas 30 minutave lojë nga portugezi Ruben Diaz, që shfrytëzoi në maksimum asistin e Kevin de Bruyne.
“Hammers” gjithsesi u kundërpërgjigjen brenda pjesës së parë me golin e Antonios, duke shkuar me moral të lartë në dhomat e zhveshjes.
Golin e fitores për Manchester City-n e realizoi Stones në minutën e 68-të, pas bashkëpunimit me Mahrez.
Askush nuk po arrin ta ndalë skuadrën e Guardiolës në këtë fazë të dytë të kampionatit e tashmë rikthimi te titulli kampion konsiderohet një formalitet.
