Napoli pësoi një zhgënjim të jashtëzakonshëm mbrëmjen e djeshme, pasi nuk arriti të marrë tre pikët ndaj Veronës dhe e mbylli sezonin jashtë zonës Champions, ndërsa presidenti De Laurentiis njoftoi menjëherë mbylljen e bashkëpunimit me trajnerin Gennaro Gattuso.
Në ditëlindjen e tij të 72-të, bosi napolitan ka nisur të mendojë menjëherë për ringritjen dhe në listën e kandidatëve për trajner po shtohen gjithmonë e më shumë emra, megjithatë vlen të theksohet se ai i Massimiliano Allegrit është përjashtuar përfundimisht.
De Laurentiis ka bisedime të hapura me ish trajnerin e Romë se Interit, Luciano Spalletti, i cili tashmë ka përfunduar detyrimet kontratore me zikaltrit dhe është gati të rikthehet me një eksperiencë të re.
Napoli është një emër mjaft i mirë për Spallettin, por palët janë ende larg një marrëveshjeje, pasi paga që pretendon trajneri italian, duket se nuk e bind aspak presidentin Aurelio De Laurentiis.
Ky i fundit ka renditur në krye të preferencave portugezin Sergio Conceicao, i cili po bën mjaft mirë në stolin e Portos dhe në sezonin që sapo u mbyll, eliminoi nga Liga e Kampionëve Juventusin.
Portugezi ka folur me drejtuesit e Portos, për t’u konfirmuar dëshirën për t’u larguar dhe nëse fiton balotazhin me Spallettin, atëherë do të fluturojë menjëherë drejt Italisë për të firmosur kontratën para se të nisë pushimet.
