Java e dytë e Kategorisë Superiore ngre siparin këtë të premte me Dinamo-Laçi (19:45), një ndër sfidat më grishëse të një raundi emocionues ndeshjesh që si gjithmonë do të transmetohen të gjitha live në Supersport. Blutë e kryeqytetit, pas rikthimit me triumf në elitën e futbollit shqiptar në fitoren 0-2 në transfertën me Kastriotin, kërkojnë një konfirmim tanimë përballë një kundërshtari të fortë si Laçi, që për më tepër vjen i etur për të reaguar pas nisjes me hap fals përballë Vllaznisë.
Konture të reja për t’u përvijuar pikërisht në këto sfida, me Dinamon e Bledi Shkëmbit të ndërtuar për t’u rikthyer në majë, aty ku I takon legjendës së futbollit shqiptar, pavarësisht se me një skuadër të ndërtuar nga e para.
Te Laçi, ndërkohë, aventura e trajnerit malazez Vukicevic nuk ka nisur ashtu si duhet, sidomos në aspektin mbrojtës, pasi kurbinasit pësuan plot 5 gola në shtëpi nga kuqeblutë, ndaj dhe sfida ndaj Dinamos është një moment ku kërkohet ringritja për të mos goditur besimin në grupin e bardhezinjve, që pas një vere të suksesshme në Kupat e Europës kërkojnë të bëjnë sërish një kampionat me petkun e pretendentëve për objektiva madhorë, ashtu si sezonin e shkuar.
Ndërkohë te Dinamo fitorja ndaj Kastriotit ka shërbyer për të injektuar qetësi, me skuadrën që demonstroi rrjedhshmëri e ide në lojë, duke evidentuar dhe golashënuesin Chinedu.
Blutë në kërkim të rikthimit te lavdia, dhe Laçi që synon të ruajë petkun e protagonistit, si gjithmonë këto vitet e fundit, kampionati sapo ka nisur, por një hap i rëndësishëm në rrugën e realizimit të ambicieve, kalon edhe nga sfida e kësaj të premteje, në “Elbasan Arena”.