Në Ipko Superligën e Kosovës luhen këtë të shtunë tri ndeshjet e para të xhiros së pestë, dy prej të cilave do të zhvillohen në 15:45 dhe një në mbrëmje në orëm 19:45.
Kampionia Drita, do ta ketë një tjetër test të vështirë në Drenas përballë Feronikelit. Edhe pse patën një nisje shumë të mirë të sezonit me suksesin ndaj Prishtinës në Superkupën e Kosovës e më pas në javën e parë ndaj KEK-ut, “intelektualët” pësuan tri humbje radhazi me Flamurtarin, Lirinë dhe Llapin, duke e detyruar trajnerin Bekim Isufi që të japë dorëheqjen. Në sfidën e sotme Drita do të drejtohet nga Afrim Shahini e Shefket Sermaxhaj. Nga ana tjetër, Ferinokeli e nisi mirë me trajnerin e ri, Zekirija Ramadani, duke grumbulluar 8 pikë nga 12 të mundshme.
Takimi tjetër i orës 15:45 është Gjilani-Ballkani, ku favoritë për të marrë maksimumin e pikëve janë vendasit. “Skifterat” nuk kanë pësuar humbje në katër ndeshjet e para, duke marrë 2 fitore dhe po kaq barazime.
Tërheq vëmendje edhe takimi i mbrëmjes në “Fadil Vokrri”, Prishtina-Ferizaj. Kryeqytetasit, të drejtuar nga Mirel Josa, në letër e kanë të lehtë kundër formacionit të Afrim Toverlanit, që renditet në vedin e parafundit, por në futboll befasitë janë gjithmonë të pranishme.