Stavri Nica nuk do të jetë më trajner i Laçit dhe vendin e tij do ta marrë trajneri vlonjat Gentjan Mezani. Kështu, trajneri durrsak bëhet i pari trajner i larguar nga ekipet e Superiores, pas vetëm 270 minutash kampionat. 67 vjeçari paralajmëroi për Supersport se do të shikojë pozicionin e tij, menjëherë pas humbjes me rezultatin e thellë 3-0 në Kukës.
“Janë larguar futbollistë pa u konsultuar dhe kanë ardhur lojtarë të tjerë pa përgjegjësi. Futbollistët e ardhur në verë, flenë nëpër hotele dhe unë stërvit të rinjtë e Laçit, ndaj do të shoh pozicionin tim”, u shpreh Nica pas humbjes në ‘Zeqir Ymeri’. Nica mori drejtimin e skuadrës kurbinase në muajin prill dhe arriti të bëjë një mbylljë fantastike të sezonit, duke ia dalë të mbajë Laçin në Superligë.
Gentian Mezani ka marrë menjëherë drejtimin e ekipit dhe do të debutojë me Laçin, në ndeshjen e Kupës së Republikës, ndaj Sopotit të Librazhdit. Vlonjati e ka nisur karrierën si trajner i moshave te Flamurtari, ndërsa më 25 tetor të 2016-ës, mori drejtimin e ekipit të parë, duke zëvendësuar Gugash Maganin. Aventura e tij te vlonjatët zgjati rreth katër muaj, për t’i lënë vendin trajnerit aktual të Flamurtarit Shpëtim Duro.
