Përfaqësuesja e Zvicrës ishte e para që i dha një goditje Italisë për ta lënë për të dytin edicion radhazi jashtë Botërorit, pasi u rendit e para në grup dhe detyroi të kaltrit të luajnë në Play Off, ku morën edhe humbjen fatale ndaj Maqedonisë së Veriut.
Megjithatë italianët janë “hakmarrë” ndaj helvetëve, këtë herë me gratë, pasi përfaqësuesja e kaltër e femrave, ka fituar 0-1 ndaj asaj të Zvicrës dhe i ka parakaluar këto të fundit.
Një gol i Cristiana Girellit me goditje dënimi në të 83-ën, rezultoi vendimtare për Italinë, që tashmë kryeson grupin dhe ka në dorë fatin për të marrë një biletë për në Botërorin e Australisë dhe Zelandës së Re.
Dy ndeshjet e fundit në grup Italia do t’i luajë në shtator ndaj Rumanisë e Moldavisë, dy kundërshtare lehtësisht të kalueshme dhe tashmë vajzat e kaltra janë vetëm një hap larg Botërorit.