Nuk pritet të ketë ndryshime në rreshtimin e Përfaqësueses së Italisë, në ndeshjen e kthimit play – off me Suedinë, që do të zhvillohet në “San Siro”, të hënën. Trajneri Gian Piero Ventura me shumë mundësi do t’i besojë të njëjtin rreshtim 3-5-2, me një ndyshim në mesfushë, ku në vend të Verratit, që është i skualifikuar, do të aktivizohet Gagliardini ose Jorginho. Sa i përket sulmit, mbetet për t’u vlerësuar gjendja e Simone Zaza-s. Gjithsesi, për momentin është e konfirmuar dyshja Immobile-Belotti. Nuk përjashtohet mundësia që Ventura të kalojë me “tredhëmbësh” në sulm, duke akivizuar edhe Insignen.
Në krahun tjetër, trajneri Andersson, konfirmon 9 nga 11 titullarë e ndeshjes së Stokholmit. Rikthehet nga pezullimi Lusting, që pritet të marrë vendin e Kraft në të djathtë të mbrojtjes. Në mesfushë ka vend për Johansson, me Claesson që do të ulet në stol.
