E përditshmja italiane “La Repubblica” shkruan këtë të premte mbi mundësinë që José Mourinho të bëhet trajneri i ri i Portugalisë, duke zëvendësuar Fernando Santos, i cili u largua pas Botërorit “Katar 2022”.
Gazeta italiane thekson se marrëdhënia mes Mourinhos dhe drejtuesve të klubit verdhekuq është “ftohur” dhe merkatoja e verës së ardhshme do të jetë vendimtare për vendimin e trajnerit, i cili do të kërkojë përforcime për të përmbushur pritshmëritë (vendet e lartë në Serinë A).
“La Repubblica” gjithashtu shton se edhe Brazili po e ndjek Mourinhon dhe po përpiqet të bëjë lëvizjet e duhura në mënyrë që portugezi të mund të marrë vendin e lënë bosh nga Tite, i cili, ashtu si Fernando Santos, u largua pas turneut në Katar.
José Mourinho ndodhet aktualisht në Portugali për të festuar Krishtlindjen dhe, siç ka paralajmëruar “A BOLA”, drejtuesit e Federatës Portugeze të Futbollit do të përpiqen gjatë kësaj periudhe të takohen me trajnerin për ta bindur atë të pranojë ftesën për të qenë trajneri i ri Portugalisë.
