Roberto Mancini ka mbërritur paraditen e sotme në Romë, ku është pritur nga shumë gazetarë, të cilët kanë pasur interes në lidhje me të ardhmen e tij në stolin e kombëtares italiane.
Vetë tekniku nga Jesi tha se duhet të pritet deri nesër, kur edhe do të takohet me drejtuesit e Federatës, për të vendosur përfundimisht nëse do të konkretizohet marrëveshja apo jo.
Gjithsesi pak minuta më vonë ishte Fabriccini, drejtuesi i përkohshëm i Federatës Italiane të Futbollit, që tha se marrëveshja me Mancinin është mbyllur.
“Me Mancinin do të ulemi për të sheshuar disa detaje të vogla, por në tërësi e kemi një marrëveshje. Mund të them se do të jetë ai trajneri i Italisë”, tha Fabriccini duke dalë nga zyrat e Federatës Italiane.