Cody Gakpo është përforcimi i Liverpoolit në sulm. 23-vjeçari ndodhej në vitin e fundit të kontratës me PSV-në, ndërkohë që u transferua në “Anfield” për 42 milionë euro.
Gakpo, i cili shënoi tre gola në pjesëmarrjen e tij të parë në një Kupë Bote me Holandën, mund të mbulojë disa pozicione në repartin ofensiv të skuadrës së Jurgen Klopp.
Lojtari me origjinë nga Togo, është ambicioz dhe shpreson të fitojë sa më shumë trofe me skuadrën angleze. “Jam shumë i emocionuar që jam këtu. Mezi pres të filloj stërvitjen dhe të luaj për këtë klub të mrekullueshëm.
Liverpooli është një skuadër e madhe, do të përpiqem të tregoj potencialin tim dhe të ndihmoj skuadrën të përjetojë momente të tjera të shkëlqyera si në vitet e fundit.
Mendoj se për mua personalisht do të jetë e mrekullueshme të rritem e përmirësohem këtu, Liverpooli ka shumë lojtarë nga të cilët mund të mësoj shumë.
Mezi po pres të luaj në Anfield. Kam dëgjuar shumë histori të bukura për stadiumin. Objektivi im është fitimi i sa më shumë trofeve me këtë skuadër”, u shpreh ish-kapiteni i PSV-së.
