Milani vazhdon të tregojë forcë dhe të fitojë larg stadiumit “San Siro”. Kuqezinjtë siguruan tri pikë shumë të rëndësishme në Verona pas suksesit 1-2 që erdhi falë golit të Sandro Tonalit nëntë minuta përpara fundit të takimit.
Mesfushori italian gjeti golin e parë sezonal në “Bentegodi”, stadium ku më 8 maj realizoi një dygolësh të paharrueshëm në triumfin 1-3 ndaj Hellas Verona, sukses shumë vendimtar për rikthimin te titulli kampion pas 11 vitesh, me Tonalin që realizonte dy herë në ditën e tij të lindjes.
Serata complicatissima del #Milan al Bentegodi contro un po' di presunzione nel primo tempo. Sandro #Tonali segna il suo primo gol in stagione, ⚽️ che pesa come un macigno. #Leao da sempre la sensazione di essere pericoloso, Diaz volto a metà, male #Giroud. pic.twitter.com/gKXusGM1nX
— Luca Maninetti (@LucaManinetti) October 16, 2022
Me fitoren e mbrëmjes së kaluar, Milani është kthyer në skuadrën e vetme në pesë kampionet kryesore të kontinentit të vjetër që nuk ka pësuar asnjë humbje jashtë fushe gjatë vitit kalendarik 2022!
Një rekord të tillë e mbanin edhe Barcelona dhe Manchester City, por këto dy skuadra u mposhtën në “Santiago Bernabeu” dhe “Anfield” përballë Realit dhe Liverpoolit. 10 fitore dhe 3 barazime numërojnë kampionët e Italisë larg “fortesës” së tyre.
Kuqezinjtë do të luajnë edhe dy transferta në Serie A deri në fund të këtij viti: atë ndaj Torinos (30 nëntor) dhe Cremoneses (8 nëntor), sfida të cilat djemtë e Stefano Piolit do të bëjnë të pamundurën për t’i fituar, por sidomos për të mos i humbur.
Ndërkohë, takimi ndaj Hellas Verona ishte special edhe për teknikun 56-vjeçar nga Parma. Pioli festoi me fitore ndeshjen numër 150 në stolin e Milanit, nga të cilat ka fituar 87. Më mirë se ai ka bërë vetëm Carlo Ancelotti sa i përket përqindjes së ndeshjeve të fituara, një tjetër emilian, i cili arriti plot 238 fitore në 420 ndeshjet në stolin e “Djallit” gjatë viteve 2001-2009.