Aventura e Gennaro Gattusos në pankinën e Fiorentinës përfundon pa nisur ende. I emëruar trajner i skuadrës vjollcë menjëherë pas përfundimit të sezonit, ish tekniku i Napolit ka pasur përplasje me drejtuesit e klubit dhe me një komunikatë zyrtare Fiorentina ka bërë publik largimin e ish-trajnerit të Napolit pa nisur ende punë me skuadrën vjollcë. Shkak janë bërë disa përplasje për merkaton, pasi dy futbollistët e kërkuar me ngulm nga Gattuso ishin mesfushori i Portos Oliveira dhe sulmuesi anësor i Valencias, Guedes, të cilët përfaqësohen nga Jorge Mendes, njëkohësisht edhe menaxher i trajnerit.
Megjithatë drejtuesit e klubit vjollcë nga njëra anë kanë hasur në pretendimet e larta të menaxherit portugez dhe nga ana tjetër në këmbënguljen e Gattusos për t’i pasur me patjetër këta futbollistë në skuadër, ndaj kanë vendosur të ndajnë rrugët duke u divorcuar me trajnerin.
Sipas mediave italiane, ditët e fundit ka pasur disa përplasje mes drejtuesve dhe trajnerit Gattuso, ndaj klubi vjollcë nuk e depozitoi në Ligë kontratën me teknikun italian dhe po tashmë Fiorentina ka nisur nga puna për të gjetur një trajner të ri për stolin që i përshtatet klubit.
Fjalën e fundit për të ardhmen e trajnerit e tha presidenti Rocco Commisso, i cili ishte njeriu që këmbënguli për emërimin e Gattusos dhe ishte pikërisht ai që vendosi për të shkarkuar ish-mesfushorin e Milanit me palët që prishën kontratën me konsensus.