Humbja e Villarrealit ndaj Real Sociedadit i dha mundësinë Sevillas të siguronte matematikisht vendin e katërt në La Liga e për rrjedhojë edhe pjesëmarrjen në Champions sezonin e ardhshëm. Për suksesin në transfertë të skuadrës baske festoi edhe Milani. Pikërisht kështu, sepse me sigurimin e Championsit nga ekipi andaluz, bëhet e detyrueshme blerja e Susos, për kartonin e të cilit Milani do të arkëtojë 21 milionë euro plus 3 milionë në formë bonusesh.
Një shumë e konsiderueshme për klubin në pronësi të Eliott, që mund ta investojë këtë shifër në sesionin e ardhshëm të merkatos. 27 milionë Milani i arkëtoi nga shitja e Piatekut te Hertha e Berlinit (plusvalencë minimale) ndërsa 24 nga Suso. Kjo do të thotë më shumë oksigjen për Milanin, për të rregulluar balancën financiare si dhe për të ndërhyrë në merkato.
Pikërisht shitja përfundimtare e Spanjollit mund ta shtyjë “Djallin” për të paguar klauzolën e largimit të Szoboszlai nga Red Bull Salzburgu, që është 25 milionë euro.