16 pikë dhe kryesim i vetëm i kampionatit, mbrojtja më e mirë në 7 javë dhe sulmi i dytë më i mirë. Partizani i këtij edicioni është krejt ndryshe nga ai që kemi parë këto vite, më i disiplinuar dhe i fokusuar vetëm në fushën e lojës. Askush nuk e priste që pas 7 javësh renditja të ishte e tillë për të kuqtë, duke lënë pas kampionët dhe nënkampionët e sezonit të kaluar, por edhe rivalë të cilët në verë kanë investuar shumë.
Akti i radhës i dhuron një përballje direkte, duelin me Kukësin në “Elbasan Arena”. 90- minutëshi i të hënës shihet si prova e pjekurisë për formacionin e drejtuar nga Skënder Gega, një sfidë për të konfirmuar ambiciet e këtij sezoni. Partizani u ndëshkua në Korçë me një penallti në sfidën e javës së parë, goli i vetëm i pësuar deri më tani, duke thyer më pas me radhë edhe disa rivalë si Flamurtarin, Tiranën, por edhe Teuta që këtë edicion ka treguar se bën pjesë tek ekipet e elitës.
Këto suksese kanë shtuar urinë te kryeqytetasit, që nga një skuadër e cila me zë modest pretendonte Europën, po kthehet në ekipin për t’u munduar për rezultatet e marra dhe lojën e zhvilluar. Tashmë në ambientet e klubit dhe te tifozët fjala titull ka nisur të përmendet më shpesh dhe dueli ndaj Kukësit do të tregojë forcën e vërtetë të ekipit, nëse partizani është gati për të synuar një objektiv madhor si triumfi në kampionat.