Pasi ka fituar qetësinë e mjaftueshme në kampionat, ku e ka çuar në 16 pikë, diferencën me Vardarin e vendit të dytë, Shkëndija do të zbresë nesër sërish në fushë, për të diskutuar gjysmëfinalen e parë të Kupës së Maqedonisë.
Shorti i ka vënë kuqezinjtë përballë skuadrës tjetër shqiptare, me bazë në Xhepçisht (fshat pranë Tetovës), Renovën ,teksa nesër në orën 14:00 skuadrat do të zhvillojnë përballjen e parë gjysmëfinale, në Tetovë.
Shkëndija eliminoi në çerekfinale Vardarin, pasi barazoi 1-1 në Shkup dhe triumfoi 4-0 në Tetovë, ndërsa Renova eliminoi një tjetër skuadër maqedonase, FK Skopje, pasi e mposhti në të dy takimet 2-0 dhe 2-1.
Të dyja skuadrat kanë si synim triumfin në Kupë, por duket se Shkëndija është dukshëm më e fortë, pasi kryeson bindshëm edhe në kampionat, ndërsa Renova pozicionohet në vendin e 7, me 25 pikë, duke qenë ende nën rrezikun e rënies nga Kategoria.
Hera e fundit që të dy skuadrat janë përballur bashkë, ka qenë më 25 Nëntor të 2017-ës, në një takim që u fitua nga Shkëndija me rezultatin 1-6. Ajo ditë përkoi edhe me 25-vjetorin e tifogrupit tetovar ‘Ballistët’, të cilët organizuan një manifestim festiv spektakolar, në shkallët e stadiumit.
