Trajneri i Manchester United, Erik ten Hag, doli në një konferencë për shtypin këtë të premte, ku u prek tema e paraqitjeve të dobëta të brazilianit Antony.
Sulmuesi 23-vjeçar është blerja e dytë më e shtrenjtë e “Djajve të Kuq” (vetëm Pogba kushtoi më shumë), por në sezonin e tij të dytë në Manchester ende nuk ka shënuar apo shërbyer për gol në 20 ndeshje.
Megjithatë, Ten Hag ka një shpjegim për këtë: “Është shumë e thjeshtë, mendoj se problemet e tij jashtë fushës e pengojnë të luajë në nivelin e kërkuar”.
Pa iu referuar drejtpërdrejt, trajneri holandez aludoi për akuzat për sulm që i janë bërë lojtarit nga ish e dashura e tij dhe më pas nga dy femra të tjera.
Antony gjithmonë e ka deklaruar veten të pafajshëm dhe ka humbur pesë ndeshje për këtë arsye.
Lojtari akuzohet për sulme dhe kërcënime ndaj ish së dashurës së tij dhe tashmë është larguar nga kombëtarja e Brazilit.
Sipas Ten Hag, këto akuza “patën ndikim” te lojtari. “Ai duhet të merret me këtë problem, ishte ai që i shkaktoi problemet, ndaj duhet t’i zgjidhë. Ne do t’i japim mbështetjen tonë të plotë, por ai duhet të bëjë më mirë.”
Lexoni edhe:
- “Kurajë, Sven! Do e fitosh edhe këtë ndeshje”, Mancini: Po lufton si luan
- Barcelona pa sulmuesin brazilian në finalen e Superkupës
- Statistika e veçantë/ Vetëm Virgil van Dijk në nivelin e mbrojtësit kuqezi
- Puna e Mourinhos nuk po bind, dueli me Feyenoordin vendos të ardhmen e portugezit në Romë
Megjithatë, trajneri holandez, i cili kishte nën urdhrat e tij Antony-n edhe tek Ajaxi për dy vjet, beson te cilësitë e lojtarit.
“Faza parasezonale ishte shumë e mire për të. Katër ndeshjet e para ishin shumë të mira. Por që në momentin që u la jashtë dhe më pas u kthye, nuk performoi siç prisnim, mund të bëjë shumë më mirë”, ka shpjeguar Ten Hag.
“Nëse flasim për Ajaxin, edhe mua më kujtohet dhe efektiviteti i tij ishte shumë i lartë, madje edhe në Champions League. Prandaj, jam i sigurt për atë që është në gjendje të bëjë, përmes pasimeve kyçe, krosimeve dhe realizimeve”, përfundoi trajneri.
Manchester United, i cili ndodhet në vendin e 8-të në Premier League, të dielën luan në fushën e Tottenhamit.
