Novak Djokovic “fluturon” në gjysmëfinale të Australian Open, madje e bën pa sforcimin më të vogël. Tenisti serb u kualifikua pasi kundërshtari i tij, japonezi Key Nishikori, u tërhoq pa u mbyllur seti i dytë i dytë për arsye dëmtimi, pas vetëm 49 minutave lojë.
Në fakt, Nole e nisi me prepotencë duelin, duke e thyer dy herë në shërbim Nishikorin, për ta mbyllur setin e parë me rezultatin e thellë 6-1. Në fund të setit të parë, japonezi, i ezauruar fizikisht edhe nga dueli me Carreno-Bustan, që zgjati 5 orë e 11 minuta, kërkoi ndihmën e fizioterapistit, ndërsa në setin e dytë e pa të pamundur të vazhdonte më tej, duke u tërhequr në gejmin e 6-të, kur Djokovic kryesonte 4-1.
Vijon dominimi i serbit në përballjet me japonezin, duke siguruar fitoren e 18-të në 20 përplasjet gjithsej.
Në gjysmëfinale të turneut Nole do të përballet me francezin Puille, që mposhti 3-1 me sete Raonic.