Jorginho ishte protagonist kryesor në sfidën e djeshme mes Chelsea dhe Manchester United në Premier League, sfidë e cila u mbyll në barazim 1-1. Mesfushori fillimisht bëri një gafë në stopim, nga e cila përfitoi Jadon Sancho që ndëshkoi blutë e Londrës.
Megjithatë, pak minuta më vonë, italo-braziliani e hoqi peshën e fajit teksa realizoi golin e barazimit nga pika e bardhë. Pas sfidës, trajneri Tomas Tuchel i ka dalë në krah lojtarit të tij dhe gabimin në stopin ia adresoi dritave në stadium.
“Jorginho e gjykoi gabim situatën dhe mendoj se ishte shumë i shqetësuar nga dritat në stadium. Janë gjëra që ndodhin, por kërkon shumë kurajo që nga ky gabim të mos prekesh dhe të vazhdosh lojën e më pas të shënosh nga penalltia. Jam shumë i lumtur që Jorginho ia doli”, u shpreh Tuchel.