Sokol Cikalleshi shënoi golin e parë në Arabinë Saudite me skuadrën e Al Khaleej aty ku është i huazuar nga turqit e Konyaspor. Sulmuesi i kombëtares u tregua i saktë nga pika e bardhë e penalltisë në minutën e 92-të të takimit duke barazuar përkohësisht rezultatin në 1-1 ndaj skuadrës së Al-Fateh.
Mirëpo, goli i Cikalleshit në fund u shndërrua në një realizim sa për statistikë pasi shokët e skuadrës lanë në baltë kavajasin duke qenë se pësuan një tjetër gol në minutën e 102-të.
Kjo ishte rrjeta e parë për sulmuesin në kampionatin e Arabisë Saudite teksa për fat të keq skuadra e shqiptarit nuk ka mundur të respektojë pritshmëritë dhe aktualisht gjendet në një krizë rezultatesh duke u renditur vetëm në vendin e 14-të me katër pikë të grumbullura pas katër ndeshjeve të para.