Featured

VIDEO/ Shtatë gola për tri pikët e para, Spanja argëtohet ndaj Kosta Rikës

Spanja fitoi 7-0 ndeshjen ndaj Kosta Rikës, duke e nisur në mënyrën më të mirë të mundshme rrugëtimin në Botërorin e Katarit. Djemtë e Luis Enriques u argëtuan, krijuan shumë raste për gol, dominuan kundërshtarët në çdo aspekt, shënuan shtatë gola dhe siguruan lehtësisht tri pikët e para në grupin E.

Marco Asensio ishte surpriza e trajnerit Luis Enrique, i cili i besoi 26-vjeçarit të Realit majën e sulmit. Pedri mori kontrollin e lojës dhe nisi të dhuronte pasime fantastike për shokët e ekipit, teksa Kosta Rika rezistoi vetëm 11 minuta, me Dani Olmon që zhbllokoi takimin (asist i Gavit).

Spanja realizoi edhe dy gola të tjerë në 20 minutat e ardhshme me Asension dhe Ferran Torres (penallti). Sulmuesi i Barcelonës shënoi golin e dytë personal në minutën e 54’, më pas pati festë dhe rekord për Gavin.

18-vjeçari i talentuar, realizoi një gol të bukur në debutimin e tij në një Kupë Bote, duke u kthyer në spanjollin më të ri që shënon në Botëror, dhe lojtari i dytë më të ri në histori pas brazilianit Pele.

Në minutat e fundit erdhën edhe golat e Charles Soler dhe Alvaro Moratës, lojtarë të ardhur nga pankina, të cilët vulosën triumfin e thellë të Spanjës, që rikthehet në fushë të dielën (27 nëntor) në një finale të parakohshme ndaj Gjermanisë.

Kupa e Botës
Katar 2022
Grupi E

SPANJË-KOSTA RIKA 7-0 (Olmo 11′, Asensio 21′, Ferran Torres 31′, 54′, Gavi 74′, Soler 90′, Morata 90+2′)

Kronika e ndeshjes:

 90+2′ Feston edhe Alvaro Morata, i cili gjeti golin e parë në Botëror dhe të 28-in me Kombëtaren falë një gjuajtjeje të saktë dhe potente. 

 

 90′ Spanja gjen edhe golin e gjashtë. Lojtari i PSG-së, Carlos Soler përfitoi nga një grushtim i Keylor Navas dhe dërgoi topin lehtësisht në rrjetë.

 

 74′ Vjen edhe goli i pestë. Morata dhuron një asist për Gavin. 18-vjeçari i Barcelonës gjuan fluturimthi dhe shënon në ndeshjen debutuese në një Kupë Bote, duke u bërë spanjolli më i ri që realizon gol në Botëror.

 

 63′ Shans i mirë për Alvaro Moratën, por diagonalja e sulmuesit të Atleticos nuk shënjestron portën kundërshtare.

 

 54′ Spanja realizon golin e katërt përballë Kosta Rikës me anë të Ferran Torres. Sulmuesi i Barcelonës gjen golin e dytë personal në takimin e parë në Katar 2022. 

 

 48′ Asensio vijon të jetë rreziku numër një për Kosta Rikën. 26-vjeçari merr një top nga Azpilicueta, por goditja me të djathtën përfundon mbi tra.

 

 45+5′ Pedri nis bukur Marco Asension, por lojtari i Realit, i cili sot po luan si qendërsulmues, gjuajti keq.

 

 31′ Ferran Torres ekzekuton saktë penalltinë dhe nis festën me shokët e skuadrës.

 

 29′ Jordi Alba sërish protagonist. Pas asistit për Asension, anësori i majtë i Barcelonës, pengohet në mënyrë të parregullt në zonë. Penallti për Spanjën.

 

 21′ Spanja realizon edhe golin e dytë. Marco Asensio gjuan menjëherë me të majtën topin e marrë nga Jordi Alba, Keylor Navas nuk e grushton siç duhet, 2-0 për skuadrën e Luis Enriques. 

 

 11′ Spanja në avantazh! Asist i Gavit, gol i Dani Olmos, i cili mori bukur topin dhe kaloi kombëtaren e tij në avantazh.

 

 9′ Tjetër mundësi e mirë për Spanjën. Pedri pason për Marco Asension. Lojtari i Realit gjuan keq dhe nuk ia del të dërgojë topin në rrjetë.

 

 5′ Pedri dhuron një pasim të mrekullueshëm për Dani Olmon, lojtari i Leipzigut nuk arrin të shënojë.

 

Dueli i parë i grupit E në Katar 2022, dhuroi një rezultat surprizë. Japonia mposhti 1-2 Gjermaninë, ndërkohë që tani është radha e takimit Spanjë-Kosta Rika (17:00). Spanja, me një brez të ri lojtarësh, synon të rikthejë shkëlqimin e viteve 2008-2012 kur mori 2 kampionate Europiane dhe një Botëror.

Megjithatë asnjë kombëtare tjetër nuk ka humbur më shumë ndeshje hapëse të Kupën e Botës sesa “La Roja”, që ka dështuar në 7 premiera të Botërorëve. Trajneri Luis Enrique shpreson që skuadra e tij të mos gabojë ndaj Kosta Rikës. Lojtarë si Pedri, Gavi dhe Ansu Fati i japin shpresë dhe besim Spanjës se mund të ketë një rrugëtim të gjatë në Katar.

Si futbollist, Luis Enrique ka bërë 12 paraqitje në Kupën e Botës për Spanjën mes viteve 1994 dhe 2002, megjithëse ai kurrë nuk e kaloi çerekfinalen. Tani shpreson si trajner të shkojë më tej, duke treguar se objektivi i tij dhe i skuadrës që drejton është të luajë 7 ndeshje në këtë Botëror. Kosta Rika, në historinë e saj ka fituar vetëm 5 ndeshje, me tre prej tyre që janë regjistruar në ndeshjet hapëse.

FORMACIONET ZYRTARE

 

 

Kliko për të komentuar

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *

Të Fundit

EVENTET NË SUPERSPORT

To Top
Evolve Web Agency Evolve Web Agency