Vllaznia rikthehet te fitorja në kampionat pas 3 javësh dhe e bën këtë në mënyrën e saj me një fitore minimale 0-1 ndaj Bylisit në Ballsh në një ndeshje ku mallakastriotët kishin nevojë urgjente për pikë. Vendosi gjithçka një gol i Albion Avdijajt me Vllazninë që blindoi pozitat e saj në zonën europiane dhe zhyti akoma më shumë Bylisin në fund të tabelës së renditjes.
Në Adush Muça, sfida nisi me Bylisin më kërkues. Në minutën e 6-të Edison Ndreca provoi të jepte sinjalin e parë në portën e shkodranëve por goditja e tij nga distance shkoi jashtë. Pas disa minutave të qeta ishte sërish Bylis që u shfaq rrezikshëm në të 23-ën teksa Edison Ndreca kishte një mundësi të artë i vetëm përballë Zogovic por në tentativë për ta shmangur u neutralizua nga portieri i Vllaznisë. E pafat skuadra e Dovedan në minutën e 31-të kur protagonist ishte sërish Edison Ndreca. Goditja fluturimthi e mesfushorit nga një pozicion i prirët u ndal nga traversa, me Ndrecën që iu afrua shumë realizimit të një goli spektakolar. Kaq për Bylisin në këtë fraksion të parë sepse më pas frenat e lojës në dorë i mori Vllaznia. Në minutën e 38-të një krosim perfekt i Herald Markut nga këndi solli edhe golin e parë të Albion Avdijaj me Vllazninë, gol që zhbllokoi shifrat. Ish-sulmuesi i Tiranës u vodhi kohën mbrojtësve të Bylisit dhe me një goditje të saktë me kokë mposhti Pano Qirkon.
Shkodranët patën një tjetër mundësi të mirë 3 minuta më vonë, me Demir Imerin që tentoi me kokë pas krosimit të Ardit Hoxhajt por goditja e tij ishte e lehtë dhe u ndal nga Pano Qirko. Në minutën e 44-t, tjetër kmundësi e mirë për shkodranët por diagonalja e Demir Imerit brenda zone për fare pak shkoi jashtë kuadratit. Me shifrat 0-1 u mbyllën 45 minutat e para, ndërkohë që edhe pjesa e dytë nisi ashtu si e para me Bylisin që kishte më shumë iniciativë. Në minutën e 52 tentativa e Qardakut nga distanca u prit në dy kohë nga Zogovic. 3 minuta më vonë ballshiotët nuk arritën të përfitonin nga një rrëmujë në zonën Vllaznisë teksa asnjë nga goditjet e futbollistëve ballshiotë nuk vuri në vështirësi Zogovic. Në të 67-ën ishte radha e Loran të tentonte nga distanca por asnjë problem për Zogovic.
Episod për moviolë në minutën e 69-të me Vllazninë që pretendoi për një penallti me anë të Albion Avdijajt por për gjyqtarin Kreshnik Bajramaj nuk kishte asgjë. Bylis nuk kishte forcë mjaftueshëm për të rrezikuar portën e shkodranëve dhe minutat e mbetura nuk sollën pothuajse asgjë me përjashtim të një tentative të Herald Markut me goditje standarte në minutën e 89-të që ishte tërësisht e pasaktë. Në Adush Muça u mbyll 0-1 për Vllazninë që mori tre pikë të arta në garën për Europën duke ruajtur vendin e 4-t edhe pas javës së 33-të, ndërkohë që Bylis i Dovedan e sheh veten buzë greminës dhe tashmë rrezikon seriozisht rënien direkte nga Superioria.