Tirana-Skënderbeu është një nga dy supersfidat e javës së 32-të në Kategorinë Superiore. Korçarët në ndeshjet në transfertë që nga dhjetori e mbrapa janë paraqitur shumë dobët, prandaj Dejvi Bregu me shokë do të synojnë të kthejnë faqe pikërisht të shtunën në Selman Stërmasi ndaj Tiranës. Gjithsesi edhe në këtë sfidë Skënderbeu nuk do të jetë i plotë pasi trajneri Orges Shehi nuk do të ketë në dispozicion dy lojtarë me shumë peshë, kapitenin Marco Radas dhe mesfushorin Bruno Dita. Të dy lojtarët kanë plotësuar numrin e kartonëve të verdhë dhe do të jenë dy mungesat e mëdha të bardhekuqve në sfidën ndaj bardhebluve. Një lajm i mirë për trajnerin e korçarëve ka të bëjë me faktin se është rikuperuar nga dëmtimi mesfushori Shqipërim Taipi.
