Pas rezultateve aspak të mira në këtë start të sezonit në kampionatin francez, presidenti i Lyonit vendosi të shkarkojë trajnerin brazilian Sylvinho, i cili ishte ulur në pankinë në maj të këtij viti, ndërsa sot ka gjetur edhe pasuesin e tij.
Bëhet fjalë për ish trajnerin e Lille, Romës dhe Olimpikut të Marsejës, Rudi Garcia, i cili aktualisht ishte i papunë, por prej pasdites së sotme do të ulet në pankinën e Lyonit dhe do të tentojë rikthimin e skuadrës në rrugën e mbarë.
Negociatat mes palëve kishin nisur prej pak ditësh, por vetëm sot Garcia dhe stafi menaxherial i tij mbërritën në Lyon për të diskutuar nga afër, ndërsa pasdite pati edhe “tym të bardhë” për arritje ne marrëveshjes për bashkëpunim deri në verën e vitit 2021.
Lyoni e nisi sezonin me Sylvinhon, duke regjistruar dy fitore bindëse, por më pas harroi shijen e triumfit, duke marrë 3 barazime dhe 4 humbje, të cilat e kanë lënë në kuotën e 9 pikëve, shumë të shkëputur nga PSG-ja kryesuese.
