Dita e fundit e 2019-s nis me një lajm të trishtë për futbollin shqiptar. Ndahet nga jeta në moshën 89-vjeçare një emër i madh i futbollit tonë, Shyqyri Rreli. Ikje pa kthim e profesorit të njohur, ikonës së qytetarisë tiranase, “Nderit të Kombit”. Shuhet një tjetër emblemë e futbollit tonë, një trajner dhe drejtues i madh, një legjendë që bëri historinë e tij edhe si trajner i Kombëtares, ku në vitrinë mbetet fitorja me Belgjikën 2-0, në atë dhjetor të vitit 1984. Ish-pedagogu i shquar i IKF nuk e priti dot ndërrimin e viteve, nuk ia doli të shijonte as 90-vjetorin e lindjes, që e kishte në maj 2020. Homazhet për këtë figurë të madhe do të mbahen sot, nga ora 12:00 deri më 14:00 te stadiumi “Air Albania”, ndërsa varrimi do të bëhet më 1 janar, ora 13:00. U prehsh në paqe mjeshtër!
Jetëshkrimi i Shyqyri Rrelit:
Datëlindja: 18.05.1930
Vendlindja: Tiranë
Roli në fushë: Mbrojtës
Numri i fanellës: 3
Karriera si futbollist
Erzeni, sezoni 1948-1949. Tirana (Puna), sezoni 1949-1951. Dinamo, sezoni 1952-1962.
Gola të shënuar 1 (Flamurtari-Dinamo 1-2, vitin 1953).
Trofetë e fituar: 4 tituj kampioni dhe 4 Kupa të Shqipërisë (Dinamo).
Pjesëtar i ekipit kombëtar: 1955-1958 (kur trajner ka qenë Adem Karapici, më pas Loro Boriçi dhe Andrea Lukshinov).
Karriera si trajner
Trajner-futbollist me ekipin e moshave “Petro Nini Luarasi”, në vitin 1961. Mësues i edukimit fizik. Trajner i klasave sportive. Pedagog i Mjeshtërisë së Lartë Sportive. Trajner-Pedagog me ekipin e Shkëndijës, fillimisht me të rinjtë, në kategorinë e dytë, dhe më pas në të parën. Trajner i Tiranës në vitet 1987-1990. Trajner dhe drejtor teknik i ekipit të sapoformuar, Albanët, në vitet 1994-1998, duke dalë në vendin e dytë, në kategorinë e dytë. Konsulent dhe më pas trajner i Teutës në vitin 1993.
Trajner i Shkumbinit për disa muaj në vitin 1996.
Trofetë e fituara si trajner 2 tituj kampion me Tiranën.
Trajner i ekipit Shpresa 1972-1982 (2 herë kampion ballkanik).
Trajner i ekipit kombëtar 1982-1990.
