Është zhvilluar sot Asambleja e Përgjithshme e Zakonshme e Shoqatës Rajonale të Futbollit Tiranë, ku morën pjesë të gjithë anëtarët e kësaj shoqate dhe u morën vendime të rëndësishme për mbarëvajtjen e futbollit në këtë rajon.
Në fillim të mbledhjes, Kryetari i SHRFT-së, Krenar Alimehmeti lexoi para anëtarëve raportin vjetor të shoqatës, ku evidentoi punën që është bërë, problematikat si edhe projektet e ardhshme. Asambleja e SHRFT u shoqërua me diskutime mes anëtarëve lidhur me aktivitetin e shoqatës dhe implementimin e projekteve.
Këtë mbledhje e përshëndeti edhe Pano Xhixho në cilësinë e anëtarit të Komitetit Ekzekutiv të FSHF-së, i cili i uroi punime të mbarë anëtarëve të shoqatës dhe u siguroi pjesëmarrësve mbështetjen e plotë të Federatës me qëllimin për të zhvilluar edhe më tej lojën e futbollit.
Lexo edhe:
- Futbollisti i parë shqiptar në radhët e Zvicrës, rrëfimi i Ramës: Edhe unë do e bëja shqiponjën
- Shansi i fundit, pas disa refuzimeve “Çekanët” zgjedhin një trajner spanjoll
- Scaloni zbulon sekretet e suksesit në Katar: Messi edhe në 2026-tën!
- Zinchenko i “nxjerr punë” Arsenalit, dy lojtarë në pikëpyetje
Ndërkaq, Xhixho i ftoi edhe të gjithë anëtarët e shoqatës që të mbështesim ekipin Kombëtar shqiptar U-16 në miqësoren e parë ndaj Italisë U-16, që zhvillohet këtë të martë në stadiumin kombëtar “Air Albania”, duke filluar nga ora 17:00.
Në asamble u diskutua gjithashtu mbi ecurinë e vitit futbollistik të shoqatës, ndonëse aktiviteti i SHRFT ka filluar me vonesë për shkak të ndërhyrjeve nga faktorë të jashtëm.
Sakaq, u prezantua implementimi i projektit “100 fusha” ku disa prej anëtarëve të shoqatës janë përfitues dhe disa të tjerë kanë shprehur interesin për t’u bërë pjesë e këtij projekti, si u diskutua për ecurinë e projekteve “Topi Yt” dhe “Uniforma Ime”.
Gjatë asamblesë u zgjodhën përmes votimit të anëtarëve edhe delegatët që do përfaqësojnë shrft në Asamblenë e Përgjithshme të Zakonshme të FSHF. Delegatët e përzgjedhur me votat e anëtarësisë janë Genc Tomorri, Enkele Likaj, Gjin Gjonpalaj, Kujtim Pashaji, Krenar Alimehmeti dhe Fatjon Muhameti.
