Australia siguroi një vend në play off, duke iu afruar edhe më shumë kualifikimit në finalet e “Rusi 2018”. Përfaqësuesja e “kangurëve” mposhti 2-1 në kohën shtesë Sirinë dhe tashmë pret përfundimin e eliminatoreve të Amerikës Qëndrore dhe Veriore për të mësuar kundërshtarin në play off. Aktualisht vendin e katërt të CONCACAF-it e mban Panamaja.
Heroi i Australisë rezultoi veterani Tim Cahill, që përmbysi avantazhin e përkohshëm të sirianëve të arritur që në minutën e 6-të falë golit të Omar al-Soma. 37-vjecari barazoi shifrat në të 13-ën, ndërsa deri në përfundim të kohës së rregullt nuk pati ndryshim tjetër rezultati. Për të përcaktuar skuadrën që do të vijonte më tej do të luheshin edhe dy pjesë me nga 15 minuta. Pikërisht në minutën e 109-të, teksa Siria ishte me një lojtar më pak, Cahill realizoi golin që i dha kualifikimin Australisë.
