Në janarin e vitit 2011, Sampdoria solli Icardin nga Barcelona në Itali, kur argjentinasi ishte vetëm 18 vjeç dhe e lançoi atë në Serinë A, gjatë sezonit 2012-2013.
Gjatë kësaj periudhe Icardi luajti 33 takime dhe shënoi 11 gola, mjaftueshëm për t’i bindur drejtuesit e Interit, që ta transferojnë në Milano. Që nga vera e vitit 2013, argjentinasi luan te Inter, ku është shndërruar në kapitenin, bomberin dhe liderin e skuadrës zikaltër.
Por, nëse i hedh një sy shifrave, vëren se argjentinasi nuk ka pasur aspak ‘mirënjohje’ për ish skuadrën e tij. Argjentinasi i ka shënuar Sapdorias plot 7 gola, në të gjitha përballjet e tij ndaj tyre dhe për më tepër, asnjëherë nuk ka ngurruar të festojë, duke dëshmuar qartë se goli për Interin është shumë më i rëndësishëm sesa mirënjohja sportive ndaj Sampdorias.
Vlen të përmendet fakti se Sampdoria, bashkë me Juventusin, janë ‘viktimat’ e preferuara të Icardin, në Serinë A.
