Mbrëmjen e së shtunës në finalen e Champions League, Gareth Bale do të përfaqësojë për herë të fundit fanellën e Real Madrid. Uellsiani mbyll aventurën me Los Blancos, teksa në sezonet e fundit palët kanë vazhduar bashkëjetesën vetëm prej faktit të kontratës pasi raporti është krisur prej kohësh.
Tashmë, sulmuesi anësor ka nisur të mendojë për aventurën e radhës ndërsa një mundësi është rikthimi në Premier League aty ku Bale ndihet si në shtëpinë e tij. Gjithsesi, së fundmi është përfolur edhe një mundësi transferimi në Serie A. Madje, nuk ka ngurruar edhe krahasimi me Franck Ribery i cili nga Bayern kaloi te Fiorentina ndërsa aktualisht është pjesë e Salernitanës.
Gjithsesi, ka menduar agjenti i Bale, Jonathan Barnett për ta hedhur poshtë idenë e transferimit në Itali duke theksuar se të përfaqësuarin e tij nuk do ta shohin kurrë në Serie A. “Një transferim në Itali nuk ka për të ndodhur, mendoj se nuk keni për ta parë kurrë Bale në Serie A”, u shpreh Barnett.
