Me gol e mbylli sezonin e kaluar dhe po me gol e nis këtë edicion Endri Cekici. Pogradecari u shfaq menjëherë protagonist me Olimpijan e Ljubjanës, duke qënë autor i një prej dy golave të realizuar nga skuadra kryeqytetase në takimin e parë të këtij sezoni në ligën sllovene. Olimpija mposhti në një mini-derbi të Lubjanës skuadrën e Bravos me rezultatin 0-2. AI që i dha udhë suksesit të “dragonjve” ishte pikërisht 22-vjecari shqiptar, i cili me një goditje të saktë nga jashtë zonës në minutën e 26-të nuk i dha shumë shanse portierit Gril.
Çekiçi u transferua tek Olimpija në muajin janar nga Dinamo e Zagrebit, ai ishte protagonist edhe në pjesën e dytë të sezonin të shkuar, duke realizuar 6 gola për ekipin nga Ljubjana. Ai është titullar i padiskutueshëm në skemat e trajnerit Safet Hadzic në një kohë që Olimpija kërkon të ngjitet sa më lart në kampionat dhe të vijojë aventurën në Europa League, megjithëse i duhet të përmbysë humbjen 2-3 në shtëpi ndaj Rigas. Ndërkohë që forma e mirë e Endri Çekiçit mund të jetë një sinjal pozitiv edhe për përfaqësuesen shqiptare, me fanellën e së cilës 22-vjeçari ende nuk ka zbritur në fushë.
