Në Spanjë nuk kanë fund polemikat në lidhje me El Clasicon mes Realit të Madridit dhe Barcelonës, duel që u mbyll 3-2 për skuadrën e Carlo Ancelottit.
Vendimet e dyshimta arbitrare ishin prezente në përballjen spektakolare në mitikun “Santiago Bernabeu”.
Katalanasit, që kishin fitoren alternative të vetme për t’u rifutur në garën për titullin kampion, protestuan ashpër për një gol të anuluar.
Lexo edhe:
- Asnjë ofertues për aksionet e Halilit, mbyllet ankandi i parë
- Goli “fantazmë”, te Barcelona të prerë: Të përsëritet El Clasico
- “Kushton 150 mln €”, pendohet CEO i Leverkusenit: Gabova!
- Vizita në Shqipëri i sjell fat Cannavaros, merr drejtimin e skuadrës së Serisë A
Gol fantazmë u cilësua goditja e Lamine Yamal, me topin që nuk kishte kaluar plotësisht vijën e portës sipas teknologjisë VAR.
Presidenti i klubit katalanas, Joan Laporta theksoi se Barcelona do të kërkojë përsëritjen e ndeshjes kundër “Los Blancos”.
“Siç e dini, nuk kam qenë kurrë një mbrojtës i madh i VAR-it. Sepse besoj se ashtu siç zbatohet, i heq spontanitetin e futbollit.
Por, meqenëse e kemi, atëherë teknologjia duhet të përdoret gjithmonë për të shmangur gabimet që mund të çojnë në vendime të padrejta.
VAR-i vazhdon të shkaktojë konfuzion dhe kritere kontradiktore në varësi të palëve dhe ekipeve.
Nëse, pasi të jetë analizuar dokumentacioni, do të kuptojmë se ka pasur një gabim vlerësimi siç mendojmë ne, do të marrim të gjitha masat e përshtatshme.
Pa përjashtuar veprimet e mundshme ligjore. Nëse goli konfirmohet si i rregullt, ne do të shkojmë më tej. Dhe do të kërkojmë që ndeshja të riluhet. Ashtu siç ndodhi në një ndeshje europiane për shkak të një gabimi të VAR-it”.
