Mbrojtësi 25-vjeçar shkodran Erdenis Gurishta do të mbajë shiritin e kapitenit të kuqebluve këtë sezon dhe nën një përgjegjësi të tillë, ishte dje në krah të trajnerit Thomas Brdaric, në konferencën për shtyp në prag të ndeshjes së parë të kampionatit ndaj Apolonisë.
Gurishta pranoi se shiriti i kapitenit është një përgjegjësi e dyfishtë për të, ndërsa zbuloi se në klub është punuar shumë dhe se këtë sezon pritet një Vllazni ndryshe, më e mira e viteve të fundit.
Sa peshon shiriti i kapitenit të Vllaznisë?
Të veshësh fanellën e Vllaznisë është përgjegjësi e madhe, por të jesh kapiten i saj është dy herë përgjegjësi. Unë do të mundohem që këtë shirit, që është peshë e madhe, ta mbaj me nder dhe të justifikoj besimin.
Vllaznia ka ndryshuar shumë këtë sezon. A mendoni se prurjet e reja janë ambientuar si duhet?
Normalisht kur lëvizin shumë lojtarë, qoftë kur largohen apo afrohen, ambientimi kërkon kohën e vet, por ne shpresojmë te një Vllazni ndryshe, që të jetë më e mira e këtyre viteve të fundit. Gjithsesi, duhet që të pritet dhe të shikohet më mirë në vazhdimësi kjo.
Cili është objektivi i Vllaznisë këtë sezon?
Objektivi është që t’i marrim ndeshjet një e nga një, pastaj me kalimin e tyre, të gjithë bashkë do të shikojmë ku jemi dhe çfarë objektivash do të kemi. Mendoj se forca e grupit është dhe duhet të jetë pika më e fortë e kësaj Vllaznie.
A ju ka ndihmuar bojkoti për të kolauduar më mirë skuadrën?
Më duhet të them se bojkoti u zgjat shumë dhe kjo ndikoi tek ne dhe stafi teknik. Megjithatë, jemi munduar që të mbajmë përgatitjen fizike përmes takimeve miqësore, pavarësisht se nuk është njësoj si të luash ndeshje zyrtare.