Ilir Daja nuk ishte i pranishëm në stolin e Partizanit në barazimin me Bylisin për arsye shëndetësore, megjithatë ka preferuar të thotë fjalën e tij në një lidhje telefonike me panelin e “Gol pas Goli”.
“Përpara se të përgjigjem, dua të shikoj tabelën e klasifikimit. Po thoni që nuk kemi bërë asgjë. Problemi është këtu. Me gjithë këto probleme që listuat, prapë Partizani është në vendin e 3-të. Kemi bërë një kampionat ku në pjesën më të madhe kemi qenë mbi mesatare.
Situata e Melos: “Sa për Melon, po ju them një fakt. Nëse ne kemi një humbje me Kastriotin, një humbje me Vllazninë, një penallti me Teutën, janë tri ndeshje ku Melo futet 20-25 minuta. Në vend që të ruajmë balancat ne ç’rreshtohemi. Askush nuk e ka vendin të sigurt në formacion. Më mirë të luajë një lojtar i ri, sesa një lojtar që ndoshta emrin ka dhe në fushë nuk jep asgjë.”
Mungesë agresiviteti: “Kur dihen rezultatet e ndeshjeve ndonjëherë bëhet një ngarkesë më e madhe psikologjike sepse kërkon me doemos ta fitosh lojën. Ajo që na shqetëson, pa e hequr përgjegjësinë, lojtarët nuk përplasen fare. Shikoja lojtarët e Bylisit, brenda rregullores këtë herë, sepse herë të tjera dalin nga rregullorja, që kërkonin t’i fitonin dyluftimet. Ndërsa ne kemi disa lojtarë, që duan të luajnë vetëm kur u vjen topi”.