Leicester City vazhdon t’i rezistojë presionit të Manchester United sa i takon kartonit të Harry Maguire, të cilin “Djajtë e Kuq” kanë më shumë se një vit që e kërkojnë, që kur ekipi drejtohej nga portugezi Mourinho.
Disa ditë më parë, trajneri i “Dhelprave”, Brendan Rodgers, deklaroi se për mbrojtësin nuk ka ndryshuar asgjë dhe se klubi nuk ka nevojë të shesë lojtarë për të rregulluar financat. Ai theksoi se 26-vjeçari është shumë i rëndësishëm për projektin afatgjatë të klubit dhe se ai nuk ka ndërmend të privohet nga shërbimet e lojtarit.
Por me sa duket, fjalët e e tij kanë rënë në vesh të shurdhët, pasi trajneri i “Djave të Kuq”, Ole Gunnar Solskjær, nuk ka aspak ndërmend të dorëzohet, pasi e dëshiron me çdo kusht Maguire në skuadër për sezonin e ardhshëm, sidomos pas dëmtimit në gju të Eric Bailly-t në fitoren 2-1 ndaj Tottenhamit në International Champion Cup.
Për momentin, nuk dihet ende shkalla e dëmtimit të 25-vjeçarit, i cili do t’u nënshtrohet menjëherë vizitave të detajuara mjekësore. Numri 1 i stolit të ekipit nga “Old Trafford” i ka kërkuar drejtuesit Ed Woodward të përshpejtojë tratativat për të arritur sa më parë te Maguire, i cili nga ana e tij u ka kërkuar drejtuesve të klubit ta lënë të lirë për t’u transferuara te Manchester United.
Për të bindur Leicesterin të heqë dorë nga futbollisti Woodward i ka vënë në tavolinë klubit të manjatit Aiyawatt Srivaddhanaprabha ofertën prej 80 milionë eurosh.
