Barcelona vuajti shumë përballë Levantes në “Camp Nou”, por në fund ia doli të merrte fitoren, edhe pse minimale, për të kthyer disi qetësinë pas humbjes së javës së kaluar në fushën e Cadizit. Golin e vetëm të këtij takimi të zhvilluar në “Camp Nou” e realizoi Lionel Messi në minutën e 76-të, pasi asistit që mori nga Frenkie de Jong.
Shumë mund dhe energji të shpenzuara nga “blaugranat” vetëm për një gol, çka tregon se vendimi për të larguar Luis Suarezin pa e zëvendësuar me një tjetër lojtar cilësor ndoshta ka qenë i gabuar.
Ndeshja mund të kishte marrë tjetër rrjedhë, nëse Jorge de Frutos, sulmuesi i Levantes, nuk do të kishte gabuar përballë ter Stegenit në minutën e 13-të.
Barcelona me këtë sukses ngjitet në vendin e tetë me 17 pikë, nëntë më pak se Real Sociedadi, që kryeson renditjen (me golaverazh më të mirë se Atletico), por që ka zhilluar dy ndeshje më shumë. Baskët në takimin e sotëm barazuan 1-1 me Eibarin. Po 1-1 përfundoi Betis – Vilarreal, ndërsa Granada fitoi 1-0 në fushën e Elches.