Shqipëria e vajzave do të luajë të premten e 7 prillit një ndeshje miqësore kundër përfaqësueses së Maqedonisë së Veriut. Në kuadër të kësaj sfide, ekipi kuqezi i vajzave, të drejtuara nga trajneri Armir Grima zhvilluan pasditen e djeshme seancën e parë stërvitore. Sakaq, këtë të enjte, skuadra zbriti sërish në fushë për të bërë përgatitjet e fundit në prag të sfidës me Maqedoninë e Veriut.
Mesfushorja kuqezi, Esmeralda Franja e konsideron mjaft të vlefshëm këtë takim kundër Maqedonisë së Veriut, ku sigurisht objektivi është jo vetëm konsolidimi i grupit, por edhe paraqitja pozitive e skuadrës. “Kemi zhvilluar stërvitjen e parë dje, jemi bashkuar të gjitha vajzat si grup. Na duhej një ndeshje miqësore për të parë formën e ekipit dhe për të konsoliduar grupin dhe shpresoj që të kemi sërish në të ardhmen ndeshje të tjera miqësore për t’u përgatitur për ndeshjet e ardhshme. Kemi luajtur edhe më parë me Maqedoninë e Veriut, disa miqësore në fakt. Kemi fituar ndaj tyre dhe presim sigurisht që ta fitojmë edhe këtë ndeshje dhe të bëjmë një paraqitje sa më dinjitoze” – thotë për fshf.org mesfushorja kuqezi.
Lexo edhe:
- Pas shkarkimit nga Chelsea, Potter pranë një tjetër skuadre në Premier League
- Ekskluzive/ Futbollistët e Kukësit braktisin stërvitjen që pas ndeshjes me Egnatian
- “Revolucion francez” te PSG, do “sakrifikojë” Messin e Neymar për lojtarë të Ligue 1
- Disiplina/ Tërbuni përjashtohet për pjesën e mbetur të sezonit dhe zbritet në Kategorinë e Dytë
Sa është rritur niveli i Kombëtares së vajzave? – “Vit pas viti, ekipi ka njohur rritje të madhe, por që sigurisht kërkojmë që të rritemi akoma edhe më shumë sepse skena ndërkombëtare ka nivele shumë të larta. Por, me punë besoj se do t’ia arrijmë” – nënvizon Franja, ndërsa flet edhe për vajzat e reja që i janë bashkuar ekipit.
“Do vazhdojmë t’i presim shumë mirë edhe vajzat e tjera që do vijnë dhe të bashkohen me grupin sa më shpejt dhe të paraqesin edhe ato të njëjtat gjëra që ne kemi në skuadër” – përfundon për fshf.org mesfushorja kuqezi.
Ndërkaq, edhe mbrojtësja e skuadrës shqiptare, Armera Tukaj pohon se atmosfera në grupin kuqezi është shumë e mirë përpara ndeshjes me Maqedoninë e Veriut. “Atmosfera në ekip është shumë e mirë. Vajzat i kemi mirëpritur ashtu siç ne dimë t’i mirëpresim”.
Miqësorja e nesërme? – “Maqedonia e Veriut nuk është një kundërshtare as e lehtë, as e vështirë. Por ne kemi mësuar që çdo rival është i barabartë. Ne do hyjmë në fushë me synimin që të paraqitemi sa më mirë dhe rezultati të jetë sa më pozitiv. Fokusi ynë në këtë ndeshje është që të paraqitemi mirë dhe të luajmë si një ekip i bashkuar. Në fund do të vijë edhe goli” – thotë Armera, e cila flet edhe se sa i ka shërbyer skuadrës grumbullimi në muajin shkurt.
“Grumbullimi që bëmë në fillim të vitit ishte shumë intensiv. Ishte si një fazë përgatitore në prag të kësaj ndeshje miqësore. Jemi përmirësuar shumë dhe kjo miqësore kundër Maqedonisë do të jenë edhe rezultat i atyre stërvitjeve intensive që ne zhvilluam në muajin shkurt”– përfundoi Armera Tukaj për fshf.org.
