Pasi ndërpreu bashkëpunimin me marrëveshje me Julian Ahmatajn, Skënderbeu ka vendosur t’ia besojë pankinën ish sulmuesit të njohur Migen Memelli, i cili ka udhëtuar sot drejt Korçës dhe pritet të bëjë prezantimin zyrtar.
Memelli ka arritur marrëveshjen me presidentin e korçarëve Ardian Takaj dhe do të nisë menjëherë nga puna, pasi do të provojë të sigurojë mbijetesën me Skënderbeun, një mision ky që duket mjaft i komplikuar deri në këtë pikë të sezonit.
Kjo pasi në 17 javë korçarët kanë grumbulluar vetëm 12 pikë dhe mbijetesa direkt duket e pamundur, por shpresat janë për vendin e 8 të renditjes, që do t’u jepte mundësi të provonin qëndrimin mes më të mirëve nëpërmjet një ndeshjeje Play Off-i.
Migen Memelli ka disa eksperienca si trajner moshash, ndërsa në Kategorinë Superiore ka drejtuar për disa javë klubin e Laçit, ku ishte edhe ndihmës i trajnerit Artan Mërgjyshi. Së fundi Memelli ka qenë edhe një opinionist fiks i emisioneve sportive në Supersport.