Kategoria Superiore në Shqipëri ngriti siparin e sezonit të ri, që është edhe edicioni i 84-t i ligës elitare shqiptare, pikërisht me sfidën Kukësi-Tirana.
Ndonëse zbrisnin në fushë kampionët në fuqi përballë Kukësit në një impiant modern si “Kukësi Arena”, interesi për ndeshjen hapëse të Superiores ishte minimal, çka u reflektua qartësisht në shkallët e stadiumit, ku ishin vetëm disa qindra tifozë.
Gjithsesi edhe këta pak mjaftuan që të bëheshin protagonistë në minutën e 90’, kur një shishe me ujë përfundoi pas kokës së Taulant Seferit, i cili ra i shtrirë në tokë nga goditja e befasishme, shumë pranë tribunës ballore të stadiumit.
Megjithatë ky episod kaloi si të mos kishte ndodhur asgjë, sepse pas afrimit të arbitrit kryesor dhe disa lojtarëve të Kukësit, sulmuesi i Tiranës u ngrit në më pak se 30 sekonda për të vijuar lojën.
Natyrisht ishte qartësisht një përpjekje për të minimizuar episodin, e për të mos zbehur startin e Superiores, që në start prodhoi pak emocione, pak interes dhe shumë tension.