Vllaznia synon minimalisht pjesëmarrjen në Kupat e Europës sezonin e ardhshëm dhe për këtë arsye vazhdon të përforcojë skuadrën me elementë cilësorë. Në orët e vona të së premtes klubi shkodran zyrtarizoi një tjetër goditje. Bëhet fjalë për sulmuesin Christopher Mandiangu i cili vjen me kërkesë të trajnerit Thomas Brdaric që e njeh shumë mirë pasi futbollisti me origjinë kongoleze vite më parë ka luajtur për skuadrat e moshave të kombëtares gjermane. 28-vjeçari i cili luan si sulmues anësor ka një karrierë të pasur pasi është aktivizuar në shumë shtete të Europës. Sëfundmi ai ka qenë pjesë e skuadrës së Widzew Lodz në ligën e tretë polake, ku është aktivizuar në 25 takime vetëm 3 prej tyre si titullar dhe ka shënuar 4 gola. Mandiangu ka qenë pjesë edhe Septemvri Sofia në ligën e parë bullgare ku ka shënuar 5 gola në 12 ndeshje dhe e Jaros në Finlandë me të cilët ka realizuar 8 gola në 23 takime. Statistikat e tij në 3 vitet e fundit janë pozitive ndërsa në karrierën e tij është aktivizuar fillimisht në ligat e ulta në Gjermani, për të kaluar më pas në Holandë, Sllovaki e Austri. Tashmë ai do të provojë një eksperiencë të re Vllaznia në kampionatin shqiptar, ku do të jetë një nga vlerat e shtuara të skuadrës së Brdaric në sulm.
“KF Vllaznia bën realitet një tjetër goditje në merkato. Ashtu siç ishte premtuar, sonte zyrtarisht është bërë pjesë e klubit tonë edhe futbollisti Christopher Mandiangu.Sulmuesi anësor konsiderohet një element shumë i rëndësishëm për skuadrën tonë në sezonin e ri dhe padyshim që besimi është i madh tek aftësitë e tij.Mandiangu ka firmosur një kontratë njëvjeçare me KF Vllaznia dhe nga nesër do të jetë në dispozicion të stafit teknik! Mirë se erdhe tek Vllaznia Christopher!”, njofton klubi shkodran.