Në futboll asgjë nuk është e lehtë. Diogo Jota ka sakrifikuar shumë për t’u bërë futbollisti që është sot. 25-vjeçari luan me Liverpoolin, një nga klubet më të mëdha në botë, teksa është edhe titullar te kombëtarja portugeze.
Sulmuesi po kalon një moment shumë të mirë, ndërkohë që është rikthyer pas në kohë në prononcimin e dhënë për Sky Sports, aty ku thekson se nuk e kishte menduar kurrë që do të shkonte kaq larg si futbollist.
”Kur isha 16 vjeç luaja për Gondomar. Më duhej të paguaja çdo muaj për të luajtur. Në fakt nuk paguaja unë, e bënin prindërit e mi. Ashtu ishin gjërat, duhet të paguaje para për të zbritur në fushë, në Portugali janë gjërat ndryshe krahasuar me Anglinë.
Vetëm kur u transferova te Paços Ferreira fillova të fitoja disa para. Gjithmonë kam punuar fort dhe jam përpjekur të arrija sa më shumë. Kur isha i ri nuk luaja me skuadra të mëdha. Shumë nga shokët e mi u transferuan te Porto dhe Benfica.
Unë konsiderohesha një lojtar i mirë, por kurrë nuk kam qenë më i miri. Kur u paraqit mundësia, e shfrytëzova. Mendoj se kur je i ri, je gjithmonë plot shpresë dhe besim për t’u bërë i suksesshëm, por nuk mendoja se do të arrija deri te Liverpooli”, deklaroi goleadori portugez, i cili sezonin e kaluar realizoi 21 gola me ekipin e Jurgen Klopp.
“The Reds” paguan 45 milionë euro në arkat e Wolves dy vite më parë për kartonin e sulmuesit luzitan. Diogo Jota ka luajtur më parë edhe me Atletico Madrid dhe Porton. “Colchoneros” e blenë 7 milionë euro nga Paços Ferreira (2016), por lojtari portugez nuk debutoi kurrë me ekipin e Diego Simeones.
TESTONI NJOHURITË TUAJA RRETH PREMIER LEAGUE
QUIZ/ Premier League 2021-2022 – Sa mirë e kujtoni sezonin që sapo u mbyll?
