Humbja e thellë 3-0 ndaj Veronës në ‘Bentegodi’, u shoqërua me vendimin për grumbullimin e Milanit në qendrën sportive, deri në një afat të pacaktuar. Ky vendim u quajt i domosdoshëm nga Gattuso, për të lidhur më shumë lojtarët me njëri-tjetrin, por edhe për të rritur përqendrimin në ekip, ndërsa në të njëjtën linjë ishin edhe drejtuesit e kuqezinjve, që mbështetën iniciativën e trajnerit.
Gjithsesi, pas 2 ditësh e gjysmë izolimi, Gattuso është treguar zemërgjerë dhe ka lejuar që në darkën e të enjtes, të marrin pjesë edhe familjarët e futbollistëve. Kështu të dashurat, gratë, fëmijët apo familjarë të tjerë të kuqezinjve janë mirëpritur në një darkë në Milanello, teksa janë takuar përreth 2 orë me të afërmit e tyre në izolim.
Nuk dihet ende nëse kjo darkë ka qenë një shpërblim nga ana e Gattusos, për angazhimin e futbollistëve, apo trajneri i Milanit ka tentuar të zbusë situatën, pasi sipas medieve pranë kuqezinjve, futbollistëve u kishte ikur buzëqeshja në këtë grumbullim. E shtuna mund të jetë dita e fundit e grumbullimit për Milanin, por në rast të ndonjë rezultati negative, nuk përjashtohet mundësia që izolimi të vijojë deri në derbin e 27 dhjetorit, për Kupën e Italisë.
