20 vjet më pas, Franca ngjitet sërish në fronin e futbollit botëror. Shpriti, grinta dhe dëshira e futbollistëve kroatë nuk mjaftoi sepse në Luzhniku triumfoi efikastiteti përpara portës dhe klasi i futbollistëve francezë. Përfundoi me plot 6 gola dhe me fitoren 4-2 të Francës një finale spektakolare që kishte gjithçka brenda. Kishte dhe fatin me vete skuadra e Deschamps me këtë të fundit që u bë personazhi i tretë që e fiton Botërorin si futbollist dhe si trajner njëkohësisht pas Zagallos dhe Beckenbauer. Përfundoi në finale ëndrra e Zlatko Dalic dhe e një populli të tërë për të fituar Kupën e Botës, megjithatë kjo Kroaci do të mbahet mend gjithmonë për atë që arriti në Rusi 2018-të dhe do të kujtohet gjithmonë si më e mira e të gjitha kohërave. Kroatët u dorëzuan përballë një France cinike dhe të kujdesshme që për të zhbllokuar shifrat kishte nevojë për një autogol të Mandzukic. Pikërisht në minutën e 18-të sulmuesi i Juventusit e dërgoi topin në rrjetën e tij në rastin e parë të gjelave në këtë ndeshje. Por nuk vonoi shumë dhe pas një aksioni model kroatët barazuan shifrat me një gol shumë të bukur të Perisic.
Por në minutën e 38-të Griezmann kthehu në gol një 11-metërsh duke i dhënë sërish epërsinë skuadrës së Deschamps pas një penalltie të dyshimtë të akorduar nga gjyqtari Pitana me ndërhyrjen e VAR për prekje me dorë të Perisic brenda zone. Me këtë rezultat përfundoi pjesa e parë ndërsa fraksioni i dytë nisi në të njëjtën muzikë si pjesa e parë me Kroacinë që kishte kontrollin e topit dhe që dominonte lojën por me Francën që gjeti sërish rrugën e rrjetës këtë herë me Paul Pogba në minutën 59-të. Nuk mund të mungonte në këtë finale goli i yllit të ri të futbollit francez Kylian Mbappe i cili në minutën e 65-të me një goditje preçize nga distanca shuajti çdo shpresë të kombëtares ballkanase për të triumfuar në këtë finale. Në të 69-ën erdhi edhe gafa e kapitenit të gjelave Lloris që i dha Mandzukic-it sadisfaksionin e një goli personal pas autogolit por vetëm kaq për Kroacinë sepse më pas Franca uli “qepanat” në prapavijë duke u lejuar kroatëve vetëm mbajtjen e topit. Përfundoi me suksesin 4-2 të Francës që ngriti në qiellin e Moskës titullin e dytë Botëror.
