Triumfi në San Sebastian përballë Real Sociedad nuk është më një tabu për Barcelonën që triumfoi për të dytin sezon radhazi në Anoeta. Kryendeshja e javës së 4-ët të La Ligas përfundoi me suksesin 1-2 të blaugranave, një fitore me shumë për skuadrën e Ernesto Valverdes që erdhi edhe për meritë të Ter Stegen që ndali disa tentativa radhazi të miqëve në fillimin e pjesës së dytë. Ishte një fitore me përmbysje ajo e Barçës që kryeson me pikë të plota pas 4 javëve të para. Në minutën e 12-të Elustondo i dha avantazhin skuadrës baske. Sociedad shpërdoroi shumë raste deri në minutën e 63-të kur një gabim i portierit Rulli u shfrytëzua nga Luis Suarez i cili barazoi rezultatin ndërsa pak çaste më vonë Dembele kaloi në avantazh blaugranat. Në fund Sociedad iu afrua sërish barazimit por për fatin e keq vendasit dolën pa pikë nga një sfidë të cilën mund ta kishin fituar.
