Kristjan Asllani po bëhet gjithnjë e më vendimtar për Empolin, teksa pasi gjeti golin e parë si profesionist javën e kaluar ndaj Interit, pasditen e sotme ka dhënë një asist mjaft të bukur për Patrick Cutronen, i cili ka shënuar golin e avantazhit ndaj Salernitanës.
Mesfushori 20-vjeçar kuqezi ka lëvizur mirë mes linjave dhe ka shërbyer Cutronen me një vertikalizim perfekt, duke i krijuar kushtet sulmuesit italian që të shënojë një gol mjaft të lehtë.
Asllani debutoi pikërisht këtë sezon me fanellën e Empolit në Serinë A dhe që prej muajit janar është shndërruar në një titullar të padiskutueshëm, ndërsa trajneri i toskanëve, Andreazzoli ka folur shpesh me superlativa, duke e cilësuar një lojtar për skuadra të mëdha.
