Barazimi i Skënderbeut në Korçë me Kamzën si dhe fitorja e Flamurtarit me Lushnjën në “Roza Haxhiu”, kanë vënë nën presion të madhe Kukësin, ekipin kampion në fuqi të Superiores, që sot, në orën 14:00, pret Partizanin në “Zeqir Ymeri”. Për presidentin Safet Gjici, fitorja ka vlerë të disafishtë, në radhë të parë për të rimarrë vendin e dytë, por edhe për të përfituar nga gabimi i Skënderbeut, që, gjithsesi, mbetet i shkëputur në krye. Aq më tepër përballë “të kuqve”, që kanë qenë rivalë të fortë për trofe, sidomos në sezonin e kaluar, suksesi do të vlente më tepër se 3 pikë.
Në Kukës, Milinkovic ndihet i rrezikuar pas 3 barazimeve radhazi dhe diferencës -8 nga Skënderbeu kryesues, por kjo me Partizanin mund të jetë ndeshja e kthesës për të dhe Kukësin. Katër takimet e fundit mes dy ekipeve nuk kanë prodhuar fitues dhe të mundësh Partizanin, që gjithashtu ka nevojë për pikë, duket një detyrë e vështirë, megjithatë duket se këtë herë Milinkovic nuk ka shumë zgjedhje, pasi pozitat e tij do të rëndoheshin dhe më tepër. Në krahun tjetër, Partizani ka një seri prej 3 humbjesh radhazi, të shoqëruara dhe me 3 ndeshje pa gol, që konfirmojnë mbi të gjitha dhe problemin në sulm. Takimi i parë i Starovës në stol nuk solli ndonjë ndryshim dhe për faktin se periudha ishte tejet e shkurtër, por dhe për të kuqtë vlen i njëjti diskutim si te Kukësi, duhet rezultati.
Në të njëjtën orë, pra në 14:00, në Gjirokastër luhet një sfidë mjaft interesante mes Luftëtarit vendas dhe Laçit. Te “bluzinjtë” vazhdojnë ta vuajnë humbjen në shtëpi e Teutën, duke ia faturuar këtë disfatë gjykimit, nga ana tjetër Laçi shkon me moral të lartë në qytetin e gurtë pas fitores 1-0 me Partizanin. Trajneri Hasan Lika e ka të qartë se përballë kurbinasve nuk do të jetë e lehtë. Skuadra e Mezanit në 5 takime që ka zhvilluar deri tani jashtë fushë, në tre prej tyre ka marrë pikë, madje dy fitore dhe një barazim, ndërsa Luftëtari në fushën e tij rezulton të jetë mes më të dobëtave me vetëm një fitore e një barazim në 5 takime. Për shumë arsye Luftëtari – Laçi mbetet një përballje e hapur, kur presioni natyrisht është te vendasit, që duan t’i largohen sa më parë zonës së ftohtë.
Java 11
Lushnja – Flamurtari 0-1
Skënderbeu – Kamza 1-1
Teuta – Vllaznia 1-0
Sot, ora 14:00
Kukësi – Partizani
Luftëtari – Laçi
